MP મા ગેરકાયદે ચાલતું બાળગૃહ ઝડપાયું! 26 બાળકી ગુમ થતા તંત્રમાં દોડધામ
0
0
પોલીસે એફઆઈઆર નોંધી હતી અને રાષ્ટ્રીય બાળ આયોગ પણ દોડતું થયું
મધ્યપ્રદેશની રાજધાની ભોપાલમાં મંજૂરી વગર જ એક ગેરકાયદે ચાઇલ્ડ હોમ ચાલી રહ્યું હોવાના અહેવાલે ખળભળાટ મચાવી દીધો છે. આ ચાઈલ્ડ હોમમાંથી (બાળગૃહ) 26 બાળકીઓ ગુમ હોવાનો સનસનાટી મચાવતો મામલો સામે આવ્યો છે. જેની જાણ થતાં જ પોલીસે એફઆઈઆર નોંધી હતી અને રાષ્ટ્રીય બાળ આયોગ પણ દોડતું થયું હતું.
68 બાળકીઓની એન્ટ્રી અને મળી ફક્ત 41
માહિતી અનુસાર 68 બાળકીઓ આ બાળગૃહમાં રહેતી હોવાની એન્ટ્રી મળી હતી પરંતુ તપાસમાં ફક્ત 41 જ બાળકીઓ મળી આવી હતી. આ બાળગૃહમાં ગુજરાત, ઝારખંડ, રાજસ્થાન, ઉપરાંત મધ્યપ્રદેશના સિહોર, રાયસેન, છિંદવાડા અને બાલાઘાટની બાળકીઓ પણ હતી. જોકે ગેરકાયદે રીતે ચાલતું હોવાને લીધે પોલીસે પણ આ બાળગૃહ સામે એફઆઈઆર નોંધી તપાસ હાથ ધરી હતી.
6થી 18 વર્ષની બાળકીઓ હોવાનો ખુલાસો
આ બાળગૃહનું નામ ‘આંચલ ગર્લ્સ હોસ્ટેલ’ છે. મામલાનો ખુલાસો થઈ જતાં તેનો સ્ટાફ અને મેનેજમેન્ટ રફુચક્કર થઇ ગયો હતો. પોલીસે 41 બાળકીને રેસ્ક્યૂ કરી બીજા બાળગૃહમાં શિફ્ટ કરી દીધી હતી. આ બાળકીઓની વય 6થી 18 વર્ષની વચ્ચે હોવાની જાણકારી મળી છે. આ બાળગૃહ પણ સુમસામ ખેતરોની વચ્ચે બનેલું છે. અહીંથી ગુમ બાળકીઓને લઈને માનવ તસ્કરીની આશંકા વ્યક્ત કરવામાં આવી રહી છે. અજય મેથ્યૂ નામની વ્યક્તિ આ બાળગૃહનું સંચાલન કરી રહ્યો હતો.
